ಎಂಜಿಎಂನಲ್ಲಿ ಅಂತರ್‌ಕಾಲೇಜು ಬಡಗುತಿಟ್ಟು ಯಕ್ಷಗಾನ ಸ್ಪರ್ಧೆಗೆ ಚಾಲನೆ
ಲೇಖಕರು : ಸತೀಶ್ ನಾಯಕ್ , ಪಕಳಕು೦ಜ
ಸೋಮವಾರ, ಡಿಸೆ೦ಬರ್ 9 , 2013
|
|
ಡಿಸೆ೦ಬರ್ 9, 2013
|
ಎಂಜಿಎಂನಲ್ಲಿ ಅಂತರ್‌ಕಾಲೇಜು ಬಡಗುತಿಟ್ಟು ಯಕ್ಷಗಾನ ಸ್ಪರ್ಧೆಗೆ ಚಾಲನೆ
ಉಡುಪಿ :
ಮೂಡಬಿದಿರೆಯ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ಹಾಗೂ ಆಳ್ವಾಸ್ ಧೀಂಕಿಟ ಯಕ್ಷಗಾನ ಅಧ್ಯಯನ ಕೇಂದ್ರದ ಆಶ್ರಯದಲ್ಲಿ ಉಡುಪಿಯ ಎಂಜಿಎಂ ಕಾಲೇಜಿನ ನೂತನ ರವೀಂದ್ರ ಮಂಟಪದಲ್ಲಿ ಡಿ. 9,10 ಮತ್ತು 11ರವರೆಗೆ ನಡೆಯಲಿರುವ ಅಂತರ್‌ಕಾಲೇಜು ಬಡಗುತಿಟ್ಟು ಯಕ್ಷಗಾನ ಸ್ಪರ್ಧೆಗೆ ಹಿರಿಯ ಯಕ್ಷಗಾನ ಅರ್ಥಧಾರಿ ಅಂಬಾತನಯ ಮುದ್ರಾಡಿ ಸೋಮವಾರ ಚಾಲನೆ ನೀಡಿದರು.
ಈ ಸಂದರ್ಭ ಮಾತನಾಡಿದ ಅವರು, ಆಳ್ವಾಸ್ ವಿರಾಸತ್ ಮೂಲಕ ಜನಪ್ರಿಯರಾಗಿರುವ ಡಾ.ಎಂ. ಮೋಹನ್ ಆಳ್ವ ಅವರು ಶಿಕ್ಷಣ, ಕ್ರೀಡೆ, ಕಲೆ, ಸಾಹಿತ್ಯ ಹಾಗೂ ಸಾಂಸ್ಕೃತಿಕ ರಂಗಕ್ಕೆ ನೀಡುತ್ತಿರುವ ಪ್ರೋತ್ಸಾಹದ ಕಾರಣ ಪಂಚಮುಖದ ಪರಶಿವನಂತೆ ಮಿಂಚುತ್ತಿದ್ದಾರೆ. ಚಂದ್ರನನ್ನು ಹೊತ್ತ ಶಿವನಂತೆ ಸಮಾಜಕ್ಕೆ, ಬದುಕಿಗೆ ಬೇಕಾದ್ದನ್ನು ಹೊತ್ತುಕೊಂಡು ತಿರುಗುತ್ತಿದ್ದಾರೆ. ಇಂದು ಯಕ್ಷಗಾನ ಶುದ್ಧ ಸ್ವರೂಪಗಳಲ್ಲಿ ಉಳಿದು ಕೊಂಡಿರುವುದು ಸ್ಪರ್ಧಾತ್ಮಕ ಕಾರ್ಯಕ್ರಮಗಳಲ್ಲಿ ಮಾತ್ರ ಎಂದರು.
ಅಧ್ಯಕ್ಷತೆ ವಹಿಸಿದ್ದ ಕಾಲೇಜಿನ ಪ್ರಿನ್ಸಿಪಾಲ್ ಡಾ.ಹಾ.ಲ.ನಾಕ್ ಮಾತನಾಡಿ, ಧೀಮಂತ, ಶ್ರೀಮಂತ, ಜೀವಂತವಾಗಿರುವ ಯಕ್ಷಗಾನ ಕಲೆಯಲ್ಲಿ ಸಂಶೋಧನಾ ನೆಲೆಯಲ್ಲಿ ಸಾಹಿತ್ಯ ಬೆಳೆದು ಬಂದಿಲ್ಲ. ಆದರೂ ಮೇಧಾವಿಗಳು ಹವ್ಯಾಸಿಗಳಾಗಿ ಯಕ್ಷಗಾನದತ್ತ ಹೆಚ್ಚೆಚ್ಚು ಆಸಕ್ತಿ ತಳೆಯುತ್ತಿರುವುದು ಉತ್ತಮ ಬೆಳವಣಿಗೆ. ಈ ನಡುವೆ ಕ್ರಿಕೆಟ್‌ನ ಐಪಿಎಲ್ ಮ್ಯಾಚಿನಂತೆ ಯಕ್ಷಗಾನ ಕಲಾವಿದರ ಹರಾಜು ನಡೆಯುತ್ತಿರುವುದು ಬೇಸರದ ಸಂಗತಿ ಎಂದರು.
ಎಂಜಿಎಂ ಗೋವಿಂದ ಪೈ ಸಂಶೋಧನಾ ಕೇಂದ್ರದ ನಿರ್ದೇಶಕ ಪ್ರೊ.ಎಚ್.ಕೃಷ್ಣ ಭಟ್ ಉಪಸ್ಥಿತರಿದ್ದರು. ಅಳ್ವಾಸ್ ಶಿಕ್ಷಣ ಸಂಸ್ಥೆಯ ಉಪನ್ಯಾಸಕರುಗಳಾದ ಪ್ರಸಾದ್ ಭಟ್ ಅವರು ಕಾರ್ಯಕ್ರಮ ನಿರೂಪಿಸಿ, ದಿವ್ಯಾಧರ ಶೆಟ್ಟಿ ವಂದಿಸಿದರು.
ಸಭಾ ಕಾರ್ಯಕ್ರಮದ ನಂತರ ಕಲ್ಯಾಣಪುರದ ತ್ರಿಶಾ ಪಿಯು ಕಾಲೇಜಿನ ವಿದ್ಯಾರ್ಥಿಗಳಿಂದ ' ಮಧುರಾಮಹೀಂದ್ರ ' ಯಕ್ಷಗಾನ ಪ್ರದರ್ಶನ ನಡೆಯಿತು. ಡಿ.10ರಂದು ಸಂಜೆ 4ಗಂಟೆಗೆ ಕಲ್ಯಾಣಪುರ ಮಿಲಾಗ್ರಿಸ್ ಕಾಲೇಜಿನ ವಿದ್ಯಾರ್ಥಿಗಳಿಂದ 'ವೀರವರ್ಮ ಕಾಳಗ ' ಹಾಗೂ ಸಂಜೆ 6-30ರಿಂದ ಎ.ವಿ.ಬಾಳಿಗಾ ರೂರಲ್ ಮ್ಯಾನೆಜ್‌ಮೆಂಟ್ ಸೋಶಿಯಲ್ ಸೈನ್ಸ್ ಕಾಲೇಜಿನ ವಿದ್ಯಾರ್ಥಿಗಳಿಂದ ' ಅಭಿಮನ್ಯು ಕಾಳಗ' ಪ್ರದರ್ಶನ ನಡೆಯಲಿದೆ.
ಡಿ. 11ರಂದು ಸಂಜೆ 5ಕ್ಕೆ ಉಡುಪಿಯ ಪೂರ್ಣ ಪ್ರಜ್ಞಾ ಕಾಲೇಜಿನ ವಿದ್ಯಾರ್ಥಿಗಳಿಂದ ' ವಿದ್ಯುನ್ಮತಿ ಕಲ್ಯಾಣ ' ಹಾಗೂ ಸಂಜೆ 7ಗಂಟೆಗೆ ಸಮಾರೋಪ ಸಮಾರಂಭ ನಡೆಯಲಿದೆ.
ಕೃಪೆ :
http://www.vijaykarnataka.com
|
|
|
